25 студзеня ў Цэнтральнай навуковай бібліятэцы імя Якуба Коласа НАН Беларусі адбылася Рэспубліканская навукова-практычная канферэнцыя «Інстытут беларускай культуры (1922–1928): нараджэнне нацыі і нацыянальнай навукі», прысвечаная юбілею першага нацыянальнага навукова-даследчага цэнтра і юбілею беларускай акадэмічнай навукі. Арганізатарамі канферэнцыі выступілі ўстановы Нацыянальнай акадэміі навук Беларусі: Інстытут мовазнаўства імя Якуба Коласа, Цэнтральная навуковая бібліятэка імя Якуба Коласа, Інстытут літаратуразнаўства імя Янкі Купалы.

У працы канферэнцыі прынялі ўдзел вучоныя НАН Беларусі (супрацоўнікі указаных устаноў, а таксама Інстытута мастацтвазнаўства, этнаграфіі і фальклору імя К. Крапівы, Беларускай сельскагаспадарчай бібліятэкі імя І. С. Лупіновіча), выкладчыкі Беларускага дзяржаўнага ўніверсітэта, спецыялісты іншых устаноў. 

Удзельнікі канферэнцыі абмеркавалі вынікі даследаванняў па пытаннях гісторыі, навукова-даследчай дзейнасці Інбелкульта, спецыфікі і напрамкаў працы яго супрацоўнікаў, традыцый Інбелкульта і сучаснай навукі. Дакладчыкамі была паднятая тэма творчай спадчыны вучоных Беларусі 1920-х г. у сучасным кантэксце.

Канферэнцыя паклала пачатак навуковым мерапрыемствам, прысвечаным 100-годдзю Інбелкульта і беларускай акадэмічнай навукі.

Падчас перапынку госці форума былі запрошаны на выставу «Навуковая спадчына Інстытута беларускай культуры», якая ладзіцца ў чытальнай зале аддзела рэдкіх кніг і рукапісаў. 

У экспазіцыі раздзела «Тэрміналагічная праца. Першыя выданні» прадстаўлены працы Тэрміналагічнай камісіі. Распрацоўка навуковай тэрміналогіі на беларускай мове стала адным з магістральных напрамкаў дзейнасці Інбелкульта,  а вынікі яе застаюцца актуальнымі і запатрабаванымі і ў сучаснай Беларусі. Цікавасць у гледачоў вызваў раздзел «Гуманітарныя навукі», а менавіта працы аднаго з інбелкультаўскіх даследчыкаў беларускай фанетыкі і дыялекталогіі І. В. Воўка-Левановіча, гісторыка Дз. І. Даўгялы, археолага А. М. Ляўданскага і інш. 

Уся выстава складаецца з пяці раздзелаў. Азнаёміцца з ёй у віртуальным фармаце можна на старонках праекта ЦНБ НАН Беларусі Інбелкульт–100

Кожны жадаючы таксама можа скарыстацца магчымасцю убачыць выставу на свае вочы падчас Дзён адчыненых дзвярэй, якія праходзяць у бібліятэцы і прымеркаваныя да 100-годдзя беларускай акадэмічнай навукі.

Запрашаем на экскурсіі ўсіх ахвочых! 

Запіс па тэл. + 375 17 379 27 06