Кнігі пятроўскай эпохі (выданні грамадзянскага друку 1708–1725 гг.)

«Книги петровской эпохи из фонда Центральной научной библиотеки имени Якуба Коласа Национальной академии наук Беларуси» (Минск, 2022)

Кнігазбор грамадзянскага друку XVIII ст. у фондзе Цэнтральнай навуковай бібліятэкі імя Якуба Коласа Нацыянальнай акадэміі навук Беларусі (ЦНБ НАН Беларусі) з’яўляецца другім па велічыні ў рэспубліцы. Фарміраванне калекцыі пачалося ў 60-я гады ХХ ст., адначасова са стварэннем аддзела рэдкіх кніг і рукапісаў (АРКіР) (Цяпер – Цэнтр даследаванняў старадрукаў і рукапісаў Цэнтральнай навуковай бібліятэкі НАН Беларусі). Асноўнай крыніцай камплектавання збору быў агульны фонд бібліятэкі, з якога было адабрана больш за 100 выданняў. У далейшым калекцыя папаўнялася за кошт кніг, набытых у букіністычных магазінах, а таксама з дублетных фондаў бібліятэк Масквы, Ленігграда, Львова, Мінска.

Адмысловае значэнне для гістарычнай навукі маюць выданні перыяду кіравння Пятра І, бо менавіта тым часам адбылося зараджэнне і станаўленне грамадзянскага шрыфту.

У каталогу пададзены апісанні дзесяці экзэмпляраў дзевяці выданняў кніжных помнікаў пятроўскага часу, надрукаваных ў Маскоўскай і Санкт-Пецярбургскай друкарнях.

Акрамя бібліяграфічнага апісання, каталог змяшчае звесткі пра пераплёты, філіграні, гравюры, бытаванне. Выданне суправаджае багаты ілюстрацыйны матэрыял, што стварае візуальнае ўяўленне пра пераплёты, тытульныя аркушы і мастацкае афармленне кнігі. У дадатак да навуковага апісання аднаго з экзэмпляраў чытачу прапаноўваецца “Схема роду Спіцыных”. Схема складзена па ўладальніцкіх запісах і змяшчае інфармацыю пра гады жыцця дванаццаці дзяцей былога ўладальніка Календара 1721 г. Міхаіла Іванавіча Спіцына і яго супругі Ганны Карлаўны.

Кнігі таго часу дайшлі да нашых дзён у абмежаванай колькасці, таму кожны асобнік з фонду ЦНБ НАН Беларусі ўнікальны і ўяўляе вялікую гістарычную і культурную каштоўнасць. Да выдання дадаецца кампакт-дыск, што змяшчае электронныя копіі кніг.

Прызначаецца работнікам бібліятэк і музеяў, гісторыкам, кнігазнаўцам, а таксама ўсім, каго цікавіць кніжная культура.