Святочная выстава “Прыйшла Калядка, спякла аладкі”

Прыйшла Калядка,
Спякла аладкі,
Карміла дзетак
І так і гэтак:
То з верашчакай,
То з мёдам з макам,
І з малачком,
І з тваражком.
Была й смятанка,
Былі й баранкі,
Каўбас і сала,
Яец нямала.

У чытальнай зале рэдкіх кніг дэманструецца святочная выстава “Прыйшла Калядка, спякла аладкі”.

На выставе можна пабачыць паэтычныя і празаічныя творы беларускіх пісьменнікаў 1910-х ‒ 1940-х гг., прысвечаныя зіме і зімовым святам. Гэта вершы і аповяды Янкі Купалы, Якуба Коласа, Максіма Танка, Змітрака Бядулі, Цішкі Гартнага, Алеся Гаруна, Міхася Чарота, Пятруся Броўкі, Міхася Машары, Андрэя Александровіча, Алеся Гурло, Юркі Лявоннага.

Асобна можна сказаць пра цікавае дарэвалюцыйнае выданне “Апавядання і легенды вершам розных аўтараў”, выпушчанае ў 1914 г. у знакамітай друкарне Марціна Кухты ў Вільне. Кніга надрукаваная лацінкай і складаецца з двух дзясяткаў вершаваных аповядаў такіх беларускіх аўтараў, як Альберт Паўловіч, Карусь Каганец, Канстанцыя Буйло. Сярод вершаў ёсць і твор Лявона Лобіка “Калядны вечар”.

Таксама на выставе прадстаўленыя разнастайныя беларускія часопісы і газеты даваеннага часу. Так, выстава пачынаецца з навагодніх выпускаў “Нашай Нівы”, адной з першых беларускамоўных газет, якая стала правадыром беларускага Адраджэння на пачатку ХХ стагоддзя.

Такжа дэманструюцца заходнебеларускія часопісы “Шлях Моладзі”, “Злучэнне”, “Хрысціянская Думка” і дзіцячыя часопісы БССР: “Зоркі” (самы першы савецкі беларускі часопіс, прызначаны для дзетак) і “Іскры Ільіча”.