Шлях ад пачатку стагоддзя
У чытальнай зале рэдкіх кніг і рукапісаў адкрылася выстава пад назвай “Шлях ад пачатку стагоддзя”, прымеркаваная да 125-годдзя з дня нараджэння фізіёлага раслін, члена-карэспандэнта Нацыянальнай акадэміі навук Беларусі, доктара біялагічных навук, заслужанага дзеяча навукі Беларусі М.М. Ганчарыка.
На выставе экспануюцца дакументы з асабістага архіва М.М. Ганчарыка, што захоўваецца ў рукапісным фондзе Цэнтра даследаванняў старадрукаў і рукапісаў.
Экспазіцыю адкрывае раздзел, дзе змешчаны аўтабіяграфіі вучонага за розныя гады, асабісты лісток па ўліку кадраў.
Навуковая дзейнасць М.М. Ганчарыка прадстаўлена рукапісамі артыкулаў, прысвечаных даследаванням у галіне фізіялогіі раслін і фотасінтэзу, матэрыяламі да доктарскай дысертацыі, дэманструюцца навуковыя працы вучонага за розныя гады.
Асобныя падборкі дакументаў адлюстроўваюць працу вучонага на Арлоўскай бульбяной станцыі, Ігарскай сельскагаспадарчай доследнай станцыі Інстытута сельскай гаспадаркі Крайняй Поўначы, у Беларускай сельскагаспадарчай акадэміі ў Горках, у Нацыянальнай акадэміі навук Беларусі.
Адзін з раздзелаў выставы асвятляе літаратурную дзейнасць М.М. Ганчарыка. Экспануюцца асобныя нумары часопіса “Аршанскі маладняк” за 1926 і 1927 гг., для якіх М.М. Ганчарык напісаў верш “Месяц злодзеем глянуў з-за вольхі…” пад псеўданімам Я. Сявец і артыкул “Маладая сучаснасць”.
Нельга не адзначыць успаміны вучонага пра сустрэчы з старэйшымі беларускімі пісьменнікамі Я. Коласам, Я. Купалай, Ц. Гартным, М. Гарэцкім; рукапісныя матэрыялы да кнігі ўспамінаў “Шлях ад пачатку стагоддзя”, якая выйшла з друку ў 2003 г. Пэўную цікавасць выклікаюць матэрыялы да кнігі пра жыццё і дзейнасць В.Ф. Купрэвіча.
Дэманструюцца ўзоры перапіскі М.М. Ганчарыка з рознымі асобамі.
Асобныя дакументы, прысвечаныя жыццю і творчай дзейнасці М.М Ганчарыка, складаюць заключны раздзел зкспазіцыі.
Юбілейную выставу суправаджаюць асабістыя і групавыя фотаздымкі М.М. Ганчарыка з членамі літаратурнага гуртка пры Горацкай сельскагаспадарчай акадэміі, з супрацоўнікамі лабараторыі фотасінтэзу Інстытута эксперыментальнай батанікі АН БССР, з академикамі НАН Беларусі В.І. Парфенавым, І.Д. Юркевічам, М.Д. Несцяровічам, фотаздымкі святкавання 70-годдзя з дня нараджэння вучонага.
