Прэзентацыя манаграфіі Л. У. Калядзінскага
21 лютага ў Цэнтральнай навуковай бібліятэцы імя Якуба Коласа Нацыянальнай акадэміі навук Беларусі прайшла прэзентацыя манаграфіі беларускага археолага Леаніда Уладзіміравіча Калядзінскага «Верхний замок Витебска (IX-XVIII вв.)» з нагоды 70-ці годдзя аўтара.
З прывітальным словам да гасцей і ўдзельнікаў імпрэзы звярнуўся дырэктар ЦНБ НАН Беларусі Аляксандр Іванавіч Груша.
Ён адзначыў, наколькі важная гэтая падзея ў жыцці аўтара і акадэмічнай супольнасці Беларусі, а таксама шчыра прывітаў Леаніда Уладзіміравіча і ўсіх гасцей.
У сваёй урачыстай прамове дырэктар Інстытута гісторыіі НАН Беларусі Вадзім Леанідавіч Лакіза падзякаваў Леаніду Уладзіміравічу за ягоную плённую працу, адзначыў значны ўзнёсак юбіляра у айчыную археалогію, а таксама ўручыў яму ганаровую грамату.
Сам навуковец у сваёй публічнай лекцыі распавёў пра манаграфію, паступова раскрываючы галоўны змест кожнага радзела, прадэманстраваў фотаздымкі з археалагічных раскопак, падзяліўся далейшымі навуковымі планамі.
Гледачам выпала магчымасць напрамую пагутарыць з аўтарам і задаць яму свае пытанні. Пытанні былі досыць разнастайныя: датычыліся як асабістага жыцця Леаніда Калядзінскага, так і ягонай прафесійнай дзейнасці. У адказах на іх Леанід Уладзіміравіч спасылаўся на жыццёвы вопыт, распавядаў цікавыя выпадкі з мінулага, акрэсліў акалічнасці працы археолага.
Такім чынам, прэзентацыя і публічная лекцыя прайшлі вельмі цікава і карысна для гледачоў, паколькі былі напоўнены сяброўскай атмасфераю і сталі па-сямейнаму цёплымі.
А мы жадаем Леаніду Уладзіміравічу доўгіх гадоў плённай і карыснай працы дзеля Бацькаўшчыны, а таксама, каб ягоныя ўнукі годна працягвалі працу іх выдатнага дзеда.
Дарэчы, Леанід Уладзіміравіч ганарыцца сваімі дзецьмі і ўнукамі. Адзін з якіх – Цімафей – ужо тройчы удзельнічаў у археалагічных раскопках разам з дзедам. Ён таксама прыйшоў на прэзентацыю, каб падтрымаць і павіншаваць дзядулю.
Да святочнай імпрэзы супрацоўнікі бібліятэкі падрыхтавалі юбілейную выставу, на якой дэманстраваліся асноўныя працы Л. У. Калядзінскага, якія ахопліваюць перыяд з 1980 да 2021 гг. Гэта некалькі манаграфій вучонага, а таксама шматлікія навуковыя і навукова-папулярныя артыкулы, ў якіх можна знайсці асноўныя вынікі даследаванняў вучонага і праведзеных ім археалагічных раскопак. Сярод закранутых у іх тэм – знешні выгляд гарадоў Беларусі XI-XVII стст., гарадская культура, рамяство, гандаль, раскопкі ў Віцебску, Слуцку, гісторыя Капыля, Клецка і інш.
Пералік прац Леаніда Уладзіміравіча Калядзінскага прадстаўлены ў буклеце «Да 70-годдзя з дня нараджэння Л. У. Калядзінскага, кандыдата гістарычных навук, археолага».
