У чытальнай зале рэдкіх кніг і рукапісаў  падрыхтавана выстава “Радкі, падказаныя сэрцам”. Экспазіцыя прымеркавана да 100-гадовага юбілею вядомага беларускага паэта, празаіка, перакладчыка, кінасцэнарыста, лаўрэата літаратурнай прэміі імя Янкі Купалы, лаўрэата Дзяржаўнай прэміі БССР, заслужанага дзеяча культуры БССР Анатоля Сцяпанавіча Вялюгіна (1923–1994). 

    На выставе экспануюцца дакументы з кніжнага фонду Цэнтральнай навуковай бібліятэкі НАН Беларусі, а таксама асобныя матэрыялы з асабістага архіва пісьменніка, што захоўваецца ў фондзе Цэнтра даследаванняў старадрукаў і рукапісаў. 

     Так, у раздзеле “З біяграфіі” размешчаны энцыклапедычныя даведнікі, кніга аўтабіяграфій  беларускіх пісьменнікаў “Пяцьдзесят чатыры дарогі”, што даюць уяўленне  пра жыццё, дзейнасць і творчую актыўнасць Анатоля Вялюгіна.

    Раздзел “З творчай спадчыны” знаёміць з першай літаратурнай публікацыяй будучага паэта – вершам “Матчына песня”, надрукаванаым у часопісе “Полымя рэвалюцыі”, № 7–8 за 1938 г. Акрамя таго, тут  прысутнічае масіў кніжных дакументаў, які складаецца са шматлікіх паэтычных зборнікаў і асобных вершаў паэта, у тым ліку перакладзеных на рускую, украінскую, балгарскую мовы, перакладаў  на беларускую мову твораў замежных аўтараў, што належаць пяру А. Вялюгіна,  а таксама вершаў, адрасаваных дзіцячай аўдыторыі.

    Вядома, што пісьменнік з’яўлялся  складальнікам літаратурных зборнікаў, анталогій, літаратурна-папулярных выданняў, аўтарам літаратурных прадмоў. Некаторыя з іх, а таксама  кнігі з дарчымі надпісамі Вялюгіна, адрасаваныя беларускім літаратарам,  знайшлі сваё месца сярод экспанатаў юбілейнай выставы. 

    У раздзеле “Словы сяброў” сабраны кнігі беларускіх і замежных пісьменнікаў з цёплымі, шчырымі надпісамі ў адрас А. Вялюгіна – паэта і чалавеа.

    Заключны раздзел выставы  складаецца з дакументаў, што адлюстроўваюць узнагароды пісьменніка. Сярод экспанатаў –  Дыплом лаўрэата першай ступені Усебеларускага фестывалю моладзі за зборнік вершаў “Голуб на вежы”, Дыплом лаўрэата Дзяржаўнай прэміі, рашэнне журы аб прысуджэнні Літаратурнай прэміі імя Янкі Купалы за паэму “Вецер з Волгі”, Ганаровыя граматы Прэзідыумаў Вярхоўных Саветаў БССР, Літоўскай і Латвійскай ССР.

     Экспазіцыю суправджаюць фотаздымкі А. Вялюгіна розных гадоў з яго асабістага архіва.

    Выставу можна наведаць з 27 снежня 2023 г. па 20 студзеня 2024 г.