НАН Беларуси в СМИ

На Тыдні роднай мовы ў сталічным магазіне "Акадэмічная кніга" адбылася сустрэча з аўтарамі "Гістарычнага слоўніка беларускай мовы", створанага ў Інстытуце мовазнаўства імя Якуба Коласа НАН Беларусі. Гэты слоўнік — гэта гістарычная аповесць жыцця і дзейнасці беларусаў, адзначыла навуковы супрацоўнік Інстытута мовазнаўства Ганна Федарэнка. Ствараўся ўнікальны "Гістарычны слоўнік беларускай мовы" пад кіраўніцтвам дактароў філалагічных навук членаў-карэспандэнтаў НАН Беларусі Аркадзя Жураўскага і Аляксандра Булыкі.

У Прэс-цэнтры Дома прэсы прадстаўнікі Міністэрства адукацыі і Нацыянальнай акадэміі навук Беларусі, бібліятэкары і дзіцячыя пісьменнікі абмеркавалі, ці любяць чытаць юныя беларусы, якія сучасныя формы работы на ўроках літаратуры метадысты прапаноўваюць настаўнікам, і ўвогуле, што робіцца для папулярызацыі мастацкага слова сярод дзяцей і падлеткаў у нашай краіне. Удзел у абмеркаванні ўзяў і дырэктар Інстытута літаратуразнаўства імя Янкі Купалы Цэнтра даследаванняў беларускай культуры, мовы і літаратуры НАН Беларусі Іван Саверчанка.

У Дзяржаўным літаратурна-мемарыяльным музеі Якуба Коласа адбылася ХХХІІІ Міжнародная навуковая канферэнцыя "Каласавіны", прысвечаная 75-годдзю вызвалення Беларусі ад нямецка-фашысцкіх захопнікаў і 60-годдзю музея. Дом Коласа падтрымлівае цесныя стасункі з НАН Беларусі. Так, першыя "Каласавіны" адбыліся ў Цэнтральнай навуковай бібліятэцы імя Якуба Коласа. Па словах дырэктара бібліятэкі Аляксандра Грушы, зроблена вельмі шмат даследаванняў не толькі па творчасці Песняра, але і па яго ролі ў развіцці нацыі. Вучоны сакратар Інстытута літаратуразнаўства імя Янкі Купалы Цэнтра даследаванняў беларускай культуры, мовы і літаратуры НАН Беларусі Анатоль Трафімчык таксама звярнуў увагу на духоўную сувязь паміж інстытутамі і музеем.