НАН Беларуси в СМИ

За некалькі кіламетраў ад лепельскай вѐскі Верабкі, у балотным масіве паміж азѐрамі Бярэшча і Окана паўстае пясчаны пагорак, напалам перарэзаны рэчышчам ракі Бярэшча. Тут унікальны помнік археалогіі даследуюць сталічны археолаг і мясцовыя школьнікі. Адлік навуковых даследаванняў ва ўрочышчы Дубавец вядзецца з 2006 года, калі археалагічную разведку мясцовасці ўпершыню правѐў археолаг з Інстытута гісторыі Нацыянальнай акадэміі навук Беларусі Максім Чарняўскі.

Дзевяць дзён каля вёскі Верабкі ва ўрочышчы Дубавец на старажытным паселішчы эпохі мезаліту, неаліту і бронзы "Бярэшча-1" працавала экспедыцыя Інстытута гісторыі Нацыянальнай акадэміі навук Беларусі пад кіраўніцтвам загадчыка аддзела археалогіі першабытнага грамадства Максіма Чарняўскага. Археалагічныя работы вяліся разам з удзельнікамі лагера краязнаўчага профілю Слабадскога ясляў-сада — cярэдняй школы. Вучні знайшлі артэфакты, якім прыкладна 5 тысяч гадоў.

На Лепельшчыне захавалася мноства помнікаў далёкай гісторыі: ад стаянак першабытных людзей да сярэдневяковых гарадзішчаў і курганоў. Слабадскі край таксама мае багатую гісторыю. Вучні Слабадского ясляў-сада штогод удзельнічаюць у археалагічных раскопках. Таямніцы роднай мясцовасці вучням дапамагае раскрываць старшы навуковы супрацоўнік, загадчык сектара неаліту і бронзавага веку Інстытута гісторыі НАН Беларусі Максім Чарняўскі.