Міжнародны дзень роднай мовы 2014
21 лютага пад эгідай ЮНЕСКА ва ўсім свеце адзначаўся Міжнародны дзень роднай мовы.
Цэнтральная навуковая бібліятэка імя Якуба Коласа Нацыянальнай акадэміі навук Беларусі разам з Дзяржаўным музеем гісторыі беларускай літаратуры падрыхтавалі праграму святкавання Міжнароднага дня роднай мовы для навучэнцаў мінскіх школ “Мова продкаў маіх і нашчадкаў маіх – беларуская родная мова!”.
З прывітальным словам выступіў старшыня Таварыства беларускай мовы імя Ф. Скарыны, кандыдат гістарычных навук Алег Трусаў. Ён звярнуўся да гісторыі беларускай мовы, нагадаў, што пачатак яе ў бронзавым веку, і што з усіх моў Еўропы яна найбольш блізкая да санскрыту. Адзначыў і той факт, што развіваецца наша мова ва ўмовах незалежнай дзяржавы даволі хутка, аб чым сведчыць, да прыкладу, і багатая даведачная літаратура і шматлікія слоўнікі, якія адлюстроўваюць сучасны стан развіцця мовы. Спадар Трусаў заўважыў: “Я думаю, пры першых жа спрыяльных умовах беларуская мова адразу зойме ўсе сферы нашага жыцця. Добрымі прыкметамі ў развіцці мовы можна лічыць і тое, што ёй зацікавіліся і бізнесмены, кампутаршчыкі, і жыхары вялікіх гарадоў, Мінска і іншых. Ёсць штучныя перашкоды, але зараз цікавасць да гэтага пытання ізноў на ўздыме”.
Пад час мерапрыемства адбылося адкрыццё кніжнай выставы “Ці знаў хто, братцы, з вас Тараса?...”.Выстава, падрыхтаваная Цэнтральнай навуковай бібліятэкай імя Якуба Коласа Нацыянальнай акадэміі навук Беларусі, прысвечана 125-годдзю першай публікацыі знакамітай паэмы “Тарас на Парнасе”, якая яшчэ нядаўна лічылася ананімнай, твору жыццярадаснаму, камічнаму, сапраўднаму шэдэўру беларускай літаратуры ХІХ ст. На выставе прадстаўлены публікацыі паэмы, якія захоўваюцца ў фондах бібліятэкі, а гэта асобныя кніжныя выданні 1909 г., 1920 г., 1945 г. і сучасныя перавыданні. Асобны раздзел выставы прысвечаны тэме аўтарства паэмы і гісторыі раскрыцця гэтай таямніцы. Вядома, што паэма прыпісвалася пяру самым розным аўтарам – В. Дуніну-Марцінкевічу, А. Вярыгу-Дарэўскаму, студэнтам Горацкага земляробчага інстытута, Аўхіму Крупенькі і іншым. Дзякуючы працы многіх пакаленняў літаратуразнаўцаў, а ў апошні час працы Генадзя Кісялева, аўтарам “Тараса на Парнасе” лічыцца К. Вераніцын. На выставе можна было пазнаёміцца з цікавымі даследчыцкімі працамі не толькі Г. Кісялёва, але і публікацыямі Я. Янушкевіча, А. Лойкі і іншых.
Поўны спіс выданняў змешчаны ў юбілейным буклеце.
Таксама ўвазе гледачоў была прадстаўлена прэзентацыя цікавых фактаў з гісторыі стварэння паэмы і пошукаў яе аўтара, якая была падрыхтавана супрацоўніцай аддзела сацыякультурнай і інфармацыйнай дзейнасці ЦНБ НАН Беларусі Яўгеніяй Цэрэльчук.
У гонар 125 гадавіны першай публікацыі паэмы К. Вераніцына “Тарас на Парнасе” ладзіліся яе чытанні. Вучні старэйшых класаў з задавальненнем прынялі ўдзел у гэтай праграме.
Пад час мерапрыемства гучалі музыка і песьні. У святочнай праграме прынялі ўдзел дзіцячыя вакальныя калектывы Палаца дзяцей і моладзі “Арыён” г. Мінска “Дар” і “Folk-fiesta”.
